Translate Tamil to any languages.

Tuesday, 12 December 2017

முதலாவது நேர்காணலில் முகம் காட்டுகின்றேன்.

கவிதையென்றால் பாரதியார் நினைவில் வரவேண்டும்.
பாரதி பிறந்த நாளில் (11/12/1882) எனக்கொரு செய்தி கிட்டியதே! அதனைத் தங்களுடன் பகிர விரும்புகின்றேன்.

இலங்கை, யாழ்ப்பாணம், டாண் தமிழ் ஒலி தொலைக்காட்சியில் 05/10/2017 அன்றும் 06/10/2017 அன்றும் ஒளிபரப்பாகிய 'கவிதைகள் சொல்லவா' நிகழ்வில் மூத்த கவிஞர் சி.ரவீந்திரன் அவர்களுடன் சின்னப்பொடியன் யாழ்பாவாணன் அவர்களும் பங்குபற்றி இருந்தார். இருவரையும் கவிஞர் முகுந்தன் அவர்கள் நேர்காணல் மேற்கொண்டார்.

இலக்கிய உலகில் 1987 இல் நுழைந்தாலும் எனது "உலகமே ஒருகணம் சிலிர்த்தது" என்ற தொடக்க வரியைக் கொண்ட முதல் கவிதை 25/09/1990 அன்று ஈழநாதம் நாளேட்டில் வெளிவந்தாலும் என் வாழ்வில் முதலாவது நேர்காணல் இதுவென்பேன். என்னை முதலில் நேர்காணல் செய்த கவிஞர் முகுந்தன் அவர்களை எனது வலையுறவுகள் எல்லோரும் பாராட்டுவீர்கள் என நம்புகின்றேன்.

'கவிதைகள் சொல்லவா' நிகழ்வில் என்னையும் ஒரு பொருட்டாகக் கருதி அழைத்துச் சிறப்பித்தமைக்கு இலங்கை, யாழ்ப்பாணம், டாண் தமிழ் ஒலி தொலைக்காட்சி மேலாண்மைக்கும் கவிஞர் முகுந்தன் அவர்களுக்கும் உள்ளம் நிறைந்த நன்றி உரித்தாகுக.

05/10/2017 அன்று ஒளிபரப்பாகிய பதிவு

முகநூல் இணைப்பு: https://www.facebook.com/askmedianetwork/videos/490166971367649/

06/10/2017 அன்று ஒளிபரப்பாகிய பதிவு

முகநூல் இணைப்பு: https://www.facebook.com/askmedianetwork/videos/490167281367618/

இந்த நேர்காணலைப் பார்வையிட்ட பின்னர் - தங்கள்
சொந்த எண்ணங்களை வெளியிட்டு உதவுங்கள் - அவை
நாளைய எனது நகர்வுக்கு வழிகாட்டுமே!

Thursday, 7 December 2017

வணக்கமும் நன்றியும் தேவையா?


“பழையன கழிதலும்
புதியன புகுதலும் வழுவல
கால வகையினானே” என்ற
நன்னூல் நூற்பா(462) வழியே
தமிழர் பண்பாட்டைப் பேணும் நோக்கில்
நல்லவற்றை ஏற்பதில் தவறில்லையே!
ஆங்கில மொழிப் பேச்சு வழக்கான
Welcome - 'வணக்கம்' எனவும்
Hand Shake - 'கை குலுக்கல்' எனவும்
Thanks - 'நன்றி' எனவும்
Bye - 'போயிட்டு வாறேன்' எனவும்
தமிழர் செயல்களில் வரினும் - அவை
நன்னெறி காட்டிப் பாவிப்பதைப் பாரும்!
நிகழ்வாயினும் சரி
அரங்கப் (மேடைப்) பேச்சாயினும் சரி
"வணக்கம்" என்று தொடங்கி
"நன்றி" என்று முடிக்கிற
பண்பாட்டை வழக்கப்படுத்தியாச்சு!
ஆளை ஆள் சந்திக்கையில்
"வணக்கம்" என்று கைகுலுக்கி
உறவை உருவாக்கி/ புதுபித்து - பின்
"நன்றி" என்று கைகூப்பி
மலர்ந்த/ பழகிய உறவைப் பேணி
'போயிட்டு வாறேன்' என விடைபெறுவதும்
தமிழர் உறவு முறையில் பழகியாச்சு!
நன்னெறி காட்டி
பழக்கப்படுத்தியதையும்
வழக்கப்படுத்தியதையும்
மாற்றிக்கொள்ள முயன்றால் - விளைவாக
நல்ல தமிழ்ப் பண்பாடு சீரழியுமே!
எப்படி இருப்பினும்
'வணக்கம்' என்கிற 'Welcome' உம்
'நன்றி' என்கிற 'Thanks' உம்
தமிழில் தேவையே இல்லை!
பிறமொழிச் சொல் பயன்பாட்டை
தமிழில் இருந்து அகற்றாத வரை
தமிழ்ப் பண்பாடு தான்
உலகில் சிறந்தது என்று முழங்கி
பயன் ஏதாச்சும் கிட்டுமா?
பயன் கிட்டப் பக்குவமாக
பிறமொழிச் சொல் நீக்கி
நற்றமிழ் சொல் பொறுக்கி - அழகுற
எழுத்திலும் பேச்சிலும் வாழ்விலும்
பழக்கப்படுத்தி, வழக்கப்படுத்திப் புழங்க வேண்டுமே!

"ஆரியப் பழக்கம் வந்த பின்னர் தான் நமஸ்ஹாரம் என்று ஒருவரை ஒருவர் பார்த்து சொன்னார்கள். அதைத் தமிழில் எப்படி சொல்வது என்று கேட்டார்கள். அதைத் தொடர்ந்து தான் வணக்கம் நம்மை தொற்றிக் கொண்டது." எனத் தமிழகத் தமிழறிஞர் பேராசிரியர் நன்னன் அவர்கள் தெரிவித்ததாக 'எனது எண்ணங்கள்' வலைப்பூவில் அறிஞர் தி.தமிழ் இளங்கோ பகிர்ந்திருந்தார். அப்பதிவுக்குக் கருத்துரைத்த அறிஞர் ஜீவி அவர்கள் "நமஸ்காரம் வெகுதிரள் மக்களின் பயன்பாட்டில் இல்லாத நேரத்தும் 'குட்மார்னிங்' பார்த்து இதற்கு தமிழில் என்ன சொல்லலாம் என்ற யோசனையின் அடிப்படையில் வந்ததே 'வணக்கம்' என்று நினைக்கிறேன்." எனப் பகிர்ந்திருந்தார்.
https://tthamizhelango.blogspot.com/2017/12/blog-post.html


இக்கருத்துகள் என்னைச் சித்திக்கவைத்தது. அதனால், என்னுள் எழுந்த எண்ணங்களை எனது வழமையான கிறுக்கலில் உங்களுடன் பகிருகின்றேன்.

Friday, 1 December 2017

உங்களுக்குக் கவிதை எழுத வருமா?

17/12/2017 அன்று வாசிப்புப் போட்டி - 2017 
https://seebooks4u.blogspot.com/2017/10/2017.html

மதுவை விரட்டினால் கோடி நன்மை! 
தமிழ் இலக்கியத்திலே
"ஆடிப் பாடி வேலை செய்தால்
களைப்புத் தெரியாதே" என
தொழில் சார் நாட்டுப் பாடல்
அதிகமாக அன்றிருந்தது!
20 ஆம், 21 ஆம் நூற்றாண்டிலே
"களைப்புத் தெரியாமல் வேலை செய்ய
காலும் அரையும் அடித்தால் போதும்" என
முதலாளி சார் நாட்டு நடப்பு
அதிகமாக இன்றிருக்கிறதே!

தமிழ் இலக்கியத்திலே
வீட்டிலே கொண்டாட்டம் என்றால்
ஆட்டமும் பாட்டும் போட்டுக் கூடி
உண்டு களித்து மகிழ்ச்சியைப் பகிர
நாட்டுப் பாடல் நிறைய இருந்தது!
20 ஆம், 21 ஆம் நூற்றாண்டிலே
வீட்டிலே கொண்டாட்டம் என்றால்
மகிழ்ச்சியைப் பகிர்ந்து சாவைக் காண
கூடிக் குடித்துக் கும்மாளம் போடவே
குடி (மது) வகைகள் நிறைய இருக்கிறதே!

தமிழ் இலக்கியத்திலே
சாவீட்டிலும் கூடத் துயரைப் பகிர
மார்பிலடித்து அழுது புலம்ப
ஒப்பாரி (நாட்டுப்) பாடல் கூடவே இருக்கும்!
20 ஆம், 21 ஆம் நூற்றாண்டிலே
சாவீட்டிலும் கூடத் துயர (சோக) இசையும்
துயரைப் பகிரக் குடி (மது) வகையும்
எட்டிப் பார்க்கும் இழிநிலை தொடருகிறதே!

மதுப் (அற்ககோல்) பாவனை எங்கும் நுழைந்து
தமிழ் இலக்கியமும் தமிழர் பண்பாடும்
நாளுக்கு நாள் சாவடைய வைக்கிறதே!
மதுப் (அற்ககோல்) பாவனை எங்கும் நுழைந்து
வீட்டுக் வீடு மகிழ்வற்றுத் துயருற்று
ஆளை ஆள் சாகடிக்க வைக்கிறதே!
எம்மினமே! எம்உறவுகளே!
எம்மையே எண்ணிப் பாருங்கள்!
எங்கள் எதிர்காலம் என்னவாகுமென
எள்ளளவேனும் எண்ணிப் பாருங்கள்!
முகநூலில் (Facebook) "இராவணன் பாலம்" என்ற உறவின் பதிவில் வெளியாகியிருந்த படம் இது. உயிரோவியம் வரைந்தவரைப் பாராட்டுவோம்.

உங்களுக்குக் கவிதை எழுத வருமா? - அப்படியாயின்
மேற்காணும் தகவலை வைத்து, படத்தைப் பார்த்து
"மதுவை விரட்டினால் கோடி நன்மை!" என
அழகான கவிதை எழுதிக் காட்டுங்க...
கவிதைக்கான தலைப்பு எதுவாயினும் - அது
உங்கள் விருப்பத் தெரிவாக இருக்கட்டும்!

மக்கள் உள்ளங்களில் (சமூகத்தில்) மாற்றத்தை விதைக்கும்
இனிய கவிதைகளைப் பணிவோடு தொகுத்து - நாம்
மின்நூலாக வெளியிட்டுப் பகிர்ந்துதவ எண்ணியுள்ளோம்!
மரபுக் கவிதையாயினும் சரி
புதுக் கவிதையாயினும் சரி
பத்திலிருந்து இருபது வரிகளுக்குள் - உங்கள்
எண்ணங்களில் மலர்ந்த கவிதைகள் அமையணும்!

சிறந்த கவிதைகளுக்குப் பரிசில் வழங்குவோம்! மின்நூல் வெளியிடும் வேளை பரிசில் விரிப்பு வெளியிடுவோம்! உங்கள் கவிதைகளை wds0@live.com என்ற மின்னஞ்சலுக்கு 31-12-2017 இற்கு முன்னதாக அனுப்பிவைக்கவும். 

Friday, 24 November 2017

தமிழுக்காகக் கொஞ்சம் உதவுவோம்!

எப்போதும் தமிழில் பேசுவோம்
தேவைப்பட்டால்
பிறமொழியிலும் பேசுவோம்
எப்படியாயினும் - தமிழில்
பிறமொழியைச் சேர்த்துப் பேசாதீர் - அது
தமிழைக் கொல்லும் பணியே!
தமிழைக் கொல்லும் பணியைச் செய்யாது
தமிழில் பேசித் தமிழராய் இணைவோம்!

எங்கும் எதிலும் எப்போதும்
பிறமொழிகளைக் கொஞ்சம் நீக்கி வை
அப்ப தான் தமிழ்மொழி வாழும்!
எப்பவும் தான் எல்லோரும் தான்
எண்ணியவாறு நற்றமிழைப் பேண
பிறமொழிகளைக் கொஞ்சம் விலக்கி வை!

உலகெங்கும் வாழும் உறவுகள் எல்லோருக்கம்
இலகுவாய்த் தமிழின் சிறப்பை உணர்த்த
ஹாவாட்டில் தமிழுக்கான இருக்கை அமைக்க
உணர்வுள்ள தமிழர் எல்லோரும் உதவலாமே!


ஹார்வார்டு பல்கலைக்கழகத்தில் தமிழ் இருக்கை என்பது, ஐக்கிய அமெரிக்காவில் உள்ள உலகப் புகழ் பெற்ற ஹார்வார்டு பல்கலைக்கழகத்தில் தமிழைக் கற்கவும், ஆய்வுகளை மேற்கொள்வதற்கும் வசதி செய்யுமுகமாக நிறுவ உத்தேசிக்கப்பட்டுள்ள கல்விசார் இருக்கை ஆகும். தனியார் அறக்கொடைகளை அடிப்படையாகக் கொண்டு நிறுவப்படுகின்ற பிற கல்விசார் இருக்கைகளைப் போலவே தமிழுக்கான இந்த இருக்கையும் தமிழ் சமூகத்தினால் வழங்கப்படவிருக்கும் 6 மில்லியன் அமெரிக்க டாலர்கள் பெறுமதியான நன்கொடைகள் மூலம் அமைக்கப்படவுள்ளது.
ஏனைய தகவலுக்குக் கீழ்வரும் இணைப்பைச் சொடுக்குக.

ஒவ்வொருவர் உள்ளத்திலும் உருளும்
தமிழின் சிறப்புகள் ஒவ்வொன்றும்
ஒவ்வொருவராலும் பகிரப்பட்டு - அவை
நாளைய தலைமுறைக்கு உணர்த்த வேண்டும்!

பிறமொழி நீங்கில் தமிழ்மொழி வாழும்
வழியிலும் சரி வலைவழியிலும் சரி
தமிழ்மொழியைப் பேணலாம் வாரும்...
அப்ப தான் பாரும்
நாளைய தலைமுறை நற்றமிழைப் பேணும்!

Sunday, 12 November 2017

கள்ளக் காதலும் நகைச்சுவைக் காதலும்

இன்றைய (2017 இல் எழுதுகிறேன்) காலகட்டத்தில கள்ளக்காதல் அதிகம் என்பதால் தான் அறிஞர் ஒருவர் தனது வலைப் பக்கத்தில் (கூகிளில்) இப்படியொரு படத்தை இடுகையிட்டாரோ தெரியவில்லை.
மேலுள்ள படம் கூகிள் ஊடாக நகைச்சுவை எனத் தேடேக்க கிடைத்தது. அதனைச் சொடுக்க http://sakthistudycentre.blogspot.com/2013/08/free-hospital.html என்ற இணைப்பும் கிட்டியது. படத்தைப் பார்த்ததும் என்னுள் தோன்றியதை எழுதுகிறேன்.

கடற்கரையில காதலிக்க வந்த காதலி "கனநேரம் இங்க இருக்கேலாது" எனச் சொல்ல, "கொப்பரும் கொம்மாவும் 'வீட்டில ஆளைக் காணோம்' எனத் தேடுவினமோ?" எனக் காதலன் கேட்கிறான்.

"பள்ளிக்கூடத்தால பிள்ளைகள் வந்து என்னைத் தேடுவினம்" எனக் காதலி சொல்ல கடற்கரையில காதலிக்க வந்த காதலனோ "பிள்ளைகளின்ர தேப்பன்காரன் வந்தால் தன் தலை போயிடும்!" என எண்ணுகிறான்.

இந்த நேரம் பார்த்து எனது எண்ணத்தில் இப்படித் தோன்றிச்சு!

சும்மா காதலிக்கப் போகேக்க
கடற்கரையில காதல் சுகம் காணேக்க
நேரம் மட்டுப்படுத்தப்படேக்க தான்
கள்ளக்காதல் இதுவென்று தெரியவருமே!

அந்த எண்ணத்தை இப்படியும் எழுதிப் பார்த்தேன்.
1.
ஒருவன்: கள்ளக்காதல் தான் அதிகம் மகிழ்வைத் தருமே!

அடுத்தவன்: அப்படியா! அதெப்படி?

மற்றவன்: காதலிக்க வந்தவளின்ர கணவன் அல்லது அவளின்ர தகப்பனோ அண்ணன், தம்பியோ வந்து; அடி, உதை எல்லாம் பரிசாக வழங்கும் போது தெரியுமே!

2
ஒருவள்: மக்கள் முன் (Public) காதல் சுவையிருக்காதே!

அடுத்தவள்: "கண்ட கண்ட இடத்திலயும் கண்டறியாத இரண்டுகள்" என்று மக்களுக்கே வெறுத்துப் போச்சடி!

மற்றவள்: கணவன்மார் கண்டுட்டாங்கள் என்றால் எங்கட கதை போச்சடி!

அதே எண்ணத்தைத் தலைகீழாக இப்படி மாற்றி எழுதிப் பார்த்தேன்.
1
ஒருவன்: கள்ளக்காதல் என்று தெரிந்தும் தலை காட்டியது பிழையே!

அடுத்தவன்: எப்படியடா தெரியும், அவள் ஐந்து பிள்ளைகளுக்கு அம்மா என்று...

மற்றவன்: 'கண்டதே காதல் கொண்டதே கோலம்' என்றால் உப்படித் தாண்டா!

2
ஒருவள்: மக்களுக்கு (Public) முன்னால காதலிப்பதாகக் காட்டிப் பணக்காரியாகத் தலை காட்டினாய்! இப்ப என்னாச்சு?

அடுத்தவள்: மண், பொன், பணம் என அள்ளித் தந்தவன், ஐந்து பிள்ளைகளுக்கு அப்பனடி!

மற்றவள்: வருவாய் ஈட்டப் போய் வயிற்றில கருவை வேண்டியிருந்தால் உன் கதை முடிஞ்சிருக்குமடி!

அதே எண்ணத்தைத் தலைநிமிர்த்தி இப்படி மாற்றி எழுதிப் பார்த்தேன்.
1
ஒருவன்: முன்பின் அறியாமல் ஒருத்தியோட களவாகச் சந்திக்கலாமோ?

அடுத்தவன்: காதல் என்ற உணர்வு, தனியாகச் சந்திக்கத் தூண்டுமே! அவளே நாடியும் வந்தாள்...

மற்றவன்: வயிற்றில வளருற குழந்தைக்கு உன்னை அப்பனாக்க, இப்ப அவள் உன்னைத் தேடுறாளாமே!

2
ஒருவள்: மக்களுக்கு (Public) முன்னால அடுத்தவனை அடிக்கடி சந்தித்தால் தப்பாகத் தானே கதைப்பாங்க...

அடுத்தவள்: உதை அடிக்கடி நோட்டமிட்ட ஆள்கள் சொல்லியே, உன்ர கணவன் மணமுறிப்பு கேட்கிறாரோ?

மற்றவள்: கணவன் விலகினாலும் சந்தித்தவனைக் கட்டலாமென்றால் அவனுக்கும் நாலு மனைவியோ!

"வேடந்தாங்கல்" வலைப்பூவில கிடந்த படத்தைப் பார்த்து, நம்மாளுங்க "காதல்" என்று சொல்லிப் போடுகின்ற வேடங்களை எழுத வைத்த கடவுளை நேரில் சந்தித்தால் என்ன சொல்லியிருப்பார்?

போலிக் கண்களில் தெரிந்ததை நம்பி
அறிவுக் (ஞானக்) கண்ணால் பார்க்கத் தெரியாத
முட்டாள்களுக்குச் சொல்ல ஏதுமில்லை!

கடவுள் தான் இப்படிக் கையை விரிப்பார் என்றால், நம்ம சோதிடக்காரர் இருக்கிறாரே! அவரையும் நேர்காணச் சென்றேன்.

இயற்கையாய் இயல்பாய் இசைந்த - இரு
உள்ளங்களுக்குச் சோதிடம் தேவையில்லை - அது
வாக்கிய, திருக்கணித பஞ்சாங்கம் எதற்கும் சரியே!

சோதிடக்காரரின் பதில் என்னைச் சோதித்தது. அதாவது, இயற்கைக்கு முரணாக "காதல்" என்ற வெறியில் (போதையில்) தள்ளாடித் தள்ளாடி விழுகின்றவர்களைப் பற்றி எழுதியதாக எண்ணினேன். உடனே இப்படியும் எழுதத் தோன்றிச்சு!

நல்ல பொருளுக்கு விளம்பரம் வேண்டியதில்லை...
கள்ளச் சந்திப்போ பொதுச் (Public) சந்திப்போ
நல்ல காதலுக்கு ஒருபோதும் வேண்டியதில்லை...
எங்கிருந்தாலும் உள்ளங்கள் உரசினால் போதுமே!

Sunday, 5 November 2017

திரையிசைப் பாடல் எழுத முயலுங்கள்


நம்மாளுகள் திரைப் (சினிமாப்) பாடல் எழுதுவதைத் தெரிந்துகொள்ள விரும்பலாமென ஏற்கனவே நான் எழுதிய பதிவைப் படிக்கக் கீழ்வரும் இணைப்பைச் சொடுக்குக.

பாடல் எழுத என்ன தேவை?
நல்ல கவிதை தேவை!
நல்ல கவிதைக்கு என்ன தேவை?
இனிமையான இசை தேவை!
அதெப்படி?

"உன்முகம் எனக்குத் தெரிந்ததால்
எனக்குள் காதல் வந்ததே!" என

யாழ்பாவாணனும் கிறுக்கிப்போட்டு
நல்ல கவிதை என்பான் - ஆனால்
இதில் உணர்வு இருக்கு - நல்ல
இசையைக் காணவில்லையே என்பீர்!

எவரோ தாக்குரை செய்திடவே
யாழ்பாவாணனும் தன்னை நொந்து
சற்று இசையை வரவழைக்க
முயன்று பார்த்திருக்கிறார் போலும்!

"உன்அகம் அறியாமலே உன்முகம் பார்த்தேன்.
என்அகம் அறிந்தே உன்மீது காதலானேன்." என
எழுதி வாசித்துப் பார்த்தாலும் கூட...

"உன்அகம் அறியாமலே
உன்முகம் பார்த்தேன்.
என்அகம் அறிந்தே
உன்மீது காதலானேன்." என
எழுதி வாசித்துப் பார்த்தாலும் கூட...

அதே உணர்வு இருக்க, அடுத்து
ஏதோ இசை முட்டுவதைப் பார்க்கலாமே!
எதுகை, மோனை எட்டிப் பார்க்க
எழுத முயன்றதால் இவ்விசை முட்டியதோ!

மெட்டு என்றால் இசைக் கூட்டு, அதையும் சொல்லி; கதைக்கான சூழல் பற்றியும் சொல்லி பாட்டெழுது என்பாங்க... அதற்குப் பழைய பாடல் மெட்டுகளை வைத்துப் புதிய பாடல்களை எழுதிப் பழகலாமே!
எடுத்துக் காட்டிற்காக

"இன்னிசை பாடிவரும்
இளங்காற்றுக்கு உருவமில்லை
காற்றலை இல்லையென்றால்
ஒரு பாட்டொலி கேட்பதில்லை" என்ற

பாடலின் மெட்டை / இசைக் கூட்டைக் கவனித்துக் கீழுள்ளவாறு பாடல் எழுதிப் பாருங்களேன்.

மெல்லிசை காவிவரும்
குளிர்காற்றுக்கு நிறமுமில்லை
இன்னிசை இல்லையென்றால்
வரும் பாட்டொலி சுவைப்பதில்லை

இவ்வாறு இன்னொரு பாடலைப் பார்ப்போம்.

"வெயிலோடு விளையாடி
வெயிலோடு உறவாடி
வெயிலோடு மல்லுக்கட்டி
ஆட்டம் போட்டோமே" என்ற

பாடலின் மெட்டை / இசைக் கூட்டைக் கவனித்துக் கீழுள்ளவாறு பாடல் எழுதிப் பாருங்களேன்.

கிளியோடு விளையாடி
கிளியோடு உறவாடி
கிளியோடு பேச்சுக்காட்டி
பாட்டுப் போட்டோமே

இவ்வாறு இன்னொரு பாடலைப் பார்ப்போம்.

"கண்ணே கலைமானே
கன்னி மயிலென
கண்டேன் உனை நானே
கண்ணே கலைமானே
கன்னி மயிலென
கண்டேன் உனை நானே
அந்தி பகல் உனை நான் பார்க்கிறேன்
ஆண்டவனை இதை தான் கேட்கிறேன்
ராரிரரோ... ஓ... ராரிரோ...
ராரிரரோ... ஓ... ராரிரோ..." என்ற

பாடலின் மெட்டை / இசைக் கூட்டைக் கவனித்துக் கீழுள்ளவாறு பாடல் எழுதிப் பாருங்களேன்.

பெண்ணே உனைத்தானே
கண்ணில் அழகென
கண்டேன் உனை நானே
பெண்ணே உனைத்தானே
கண்ணில் அழகென
கண்டேன் உனை நானே
முந்தி எவர் உனைத் தான் பார்த்தான்
பிந்தி இவர் உனை நான் பார்த்தேன்
ராரிரரோ... ஓ... ராரிரோ...
ராரிரரோ... ஓ... ராரிரோ...

இவ்வாறு பழைய பாடல்களின் மெட்டுக்கு/ இசைக் கூட்டுக்கு பாடல் புனையப் பழகுவதன் மூலம் புதிதாகப் பாடல் புனையப் பயிற்சி கிடைக்குமென நம்புகின்றேன். ஆயினும், இதனை வழக்கப்படுத்தினால் நல்லதல்ல. ஏனெனில் உங்கள் பாடல், பழைய பாடல் மெட்டில் அமைந்திருக்குமெனத் தங்களைக் குறைவாக மதிப்பிட முயல்வார்கள். எனவே, இதனைப் பயிற்சியாகப் பேணிப் புதுப்புது மெட்டிற்கும் பாடல் புனைய முயிற்சி செய்யுங்கள்.

நானறிந்தவரை நல்ல இசைப் பாடல்களோ திரைப் பாடல்களோ அடியொன்றின் ஈற்றுச் சீரின் இசையை ஒட்டியே கேட்போர் உள்ளங்களில் குடியிருக்கிறது. அதற்கு எடுத்துக்காட்டாக "மே" என்ற இசையோடு கேட்போர் உள்ளங்களில் குடியிருக்கும் பாடலொன்றைக் கேட்டுப் படித்துப் பாருங்களேன்.


படம்: அவந்தான் மனிதன்
இசை: Ms விஸ்வநாதன்
பாடியவர்கள்: Tm சௌந்தர்ராஜன், p சுசீலா
வரிகள்: கண்ணதாசன்

அன்பு நடமாடும் கலை கூடமே
ஆசை மழை மேகமே
கண்ணில் விளையாடும் எழில் வண்ணமே
கன்னி தமிழ் மன்றமே
(அன்பு)

மாதவி கொடிப் பூவின் இதழோரமே
மயக்கும் மதுச் சாரமே
மஞ்சள் வெயில் போலும் மலர் வண்ண முகமே
மன்னர் குலத் தங்கமே
பச்சை மலைத் தோட்ட மணியாரமே
பாடும் புது ராகமே
(அன்பு)

வெள்ளலைக் கடலாடும் பொன்னோடமே
விளக்கின் ஒளி வெள்ளமே
செல்லும் இடம்தோறும் புகழ் சேர்க்கும் மனமே
தென்னர் குல மன்னனே
இன்று கவி பாடும் என் செல்வமே
என்றும் என் தெய்வமே
(அன்பு)

மானிலம் எல்லாமும் நம் இல்லமே
மக்கள் நம் சொந்தமே
காணும் நிலம் எங்கும் கவி பாடும் மனமே
உலகம் நமதாகுமே
அன்று கவி வேந்தன் சொல் வண்ணமே
யாவும் உறவாகுமே
(அன்பு)

இந்தப் பழைய பாடல் மெட்டை வைத்துப் புதிய பாடல் ஒன்றை எழுதிப் பாருங்களேன்! எனது முன்னைய எடுத்துக்காட்டில் "அத்தான்...என்னத்தான்...அவர் என்னைத்தான்..." என்ற பாடல் வரிகளை கொடுத்திருக்கிறேன். நான் எழுதிய பதிவைப் படிக்கக் கீழ்வரும் இணைப்பைச் சொடுக்குக.

"ததுங்கின ததுங்கின ததுங்கின ததுங்கின தா னானே
ததுங்கின ததுங்கின ததுங்கின ததுங்கின தா னானே"

என்ற மெட்டில் / இசைக் கூட்டில்

"கடலில எழும்புற அலைகள கேளடி ஓ மானே
மீனவர் படுகின்ற அவதிகள் கூறிடும் ஓ மானே
கடல் தண்ணி கரிக்குது காரணம் இருக்குது ஓ மானே
உடல் விட்ட வேர்வைகள் கடல் வந்து கலக்குது ஓ மானே"

என்றவாறு 'செம்பருத்தி' படத்தில் வருகிற பாடல் அமைந்திருக்குமோ? எப்படியோ இசையோடு கவிதை எழுதினாலும் திரையிசைப் பாடல் எழுதச் சில தகவல் தேவை. அவை எவை என்பதனை 'திரைப்படத்தில் மெட்டுக்கு பாடல் எழுதுவது எப்படி' என்ற தலைப்பில் கவிஞர் செந்தமிழ்தாசன் அவர்கள் விளக்குகிறார். நானும் உங்களுடன் அதனைப் பகிருகிறேன்.


இனி, திரையிசைப் பாடல் எழுதக் கற்றவற்றைத் தொகுத்துப் பார்க்க ஒரு பதிவு உண்டு. அதனைப் படிக்கக் கீழ்வரும் இணைப்பைச் சொடுக்குக.

Tuesday, 31 October 2017

எழுத்தும் பயனும்

1
எழுத்து, உனக்கு சோறு போடுமா?
எழுத்து, உனக்கு வருவாய் தருமா?
எழுத்து, உனக்கு நற்பெயரைக் கொடுக்குமா?
எழுத்து, உனக்கு நல்வாழ்வைக் கொடுக்குமா?
என்றெல்லோ வீட்டார் கேட்டுத் தொல்லை!
கலைத்தீபம், கவிமுரசு, கவியருவி,
இலக்கியச் செம்மல் என்றெல்லாம்
பட்டம் தந்து பொன்னாடை போர்த்ததும்
என் எழுத்து, எனக்களித்த பரிசென்றுரைக்க
"தாளில் கிறுக்கிக் கொடுப்பதும்
சால்வையைத் தோளில் போடுவதும்
பார்வைக்கு அழகாய் இருக்கும் - அதில்
பெறுமதி இல்லைக் காணும்" என
பெண்டாட்டி என்மீது எரிந்துவிழுவாள்!
"உனக்குப் பிள்ளை, குட்டி கிட்டாததும்
எழுத்து, எழுத்தென மூழ்கிக் கிடந்ததாலே!" என
மாமிக்காரி ஒப்பாரி வைப்பதும் நிகழும்!
"இணையம், வலைப்பக்கம் எனத் தலைகாட்டி
தூக்கத்தை விற்று நோய்களை வேண்டுறியே!" என
மாமன்காரன் அறம் பாடுவதும் நிகழும்!
"என்ர அப்பன் பண்டிதருக்குப் படிச்சவர்
இவர் என்னதான் எழுதிக் கிழிச்சென்ன!" என
என்ர அப்பன் என்னைத் திட்டுவார்!
"என்ர அப்பன் உடையாருக்குப் படிச்சவர்
இவர் எழுதித்தான் என்ன பண்ணுவார்!" என
என்ர அம்மாவும் பொரிந்து தள்ளுவார்!
இப்படிக் கேள்விக்கணைகள் காதைக் குடைந்தாலும்
நானும் என் எண்ணங்களை எழுதுகின்றேன்!
என் எழுத்தை விரும்பிப் படிப்பவர்
உள்ளம் நிறைவைத் தரும் வண்ணம்
நானும் என் எண்ணங்களை எழுதுகின்றேன்!
எழுதுவதால் தான் நானும் நிறைவடைகின்றேன்
வாசகர் உள்ளம் நிறைவடைய - நாளும்
நானும் என் எண்ணங்களை எழுதுகின்றேன்!
நல்லதை எழுதுங்கள் நல்லதை வாசியுங்கள்
உள்ளம் நிறைவடைய உணர்ந்து செய்யுங்கள்
உள (மன) நோய்கள் கிட்ட நெருங்காது
உண்ணான நெடுநாள் வாழலாம் பாருங்கோ!

2. எழுதப் பழகிய வேளை

சொந்தமாக எழுத முடியாவிட்டாலும்
மாற்றாரின் பதிவுகளைப் போல
எழுத முயன்றல் கூட
சொந்தமாக எழுத வருமே!
நானும் அப்படித் தான்
மூ.மேத்தாவின் பாவரிகளைப் போல
எழுத முயன்ற பின்னே
ஈழத்துப் பத்திரிகைகளில் வெளியான
பாவரிகளைப் பார்த்தும் - அதே போல
எழுத முயன்ற பின்னே
பா/கவிதை நடை போல
சொந்தமாக எழுதப் பழகிக்கொண்டேன்!
எழுதப் பழகியதை வைத்தே
என் எண்ணங்களைப் பகிருகிறேன்!
ஆனால், நான் எழுதுவது
கவிதை அல்லது பா அல்லது பாடல்
எது போலவும் இல்லாவிடினும்
நான் கிறுக்குவது தமிழில் தானே!

3. நீங்களும் எழுதலாம்

எனது திறமைகளை வெளிக்கொணர உதவும்
உடைமைகளைப் பொறுக்கிச் சென்றவருக்கு
தெரியவில்லைப் போலும்
கைக்கெட்டியதைக் கையாளலாம் என்றே!
கரிதுண்டால் பா/கவிதை புனைந்து
பாரதியார் - தன்
உள்ளக்கிடக்கையை வெளியிட்டது போல
நானும் என் கைக்கெட்டியதை வைத்து
எனது திறமைகளை அரங்கேற்றுகிறேன் - நாளும்
எனது திறமைகள் வெளிவருகின்றனவே!
'முடியாது' என்பது
நம்மாளுங்க (மனித) அகரமுதலியில்
இருக்கக்கூடாது என்றாலும்
'முடியும்' என்பதற்கு
பயிற்சியும் முயற்சியும் இருந்தால் போதுமே!
அப்படியாயின் - நீங்களும்
எப்படியாவது உங்கள் திறமைகளை
அரங்கேற்ற முன்வாருங்கள் - உங்கள்
நல்லெண்ணங்களைப் பகிருங்கள்
எழுத்தும் பயனும் என்னவென்று உணருவீர்!