Translate Tamil to any languages.

Sunday, 12 August 2018

பாப்புனைவது பற்றிய தகவல்




தமிழ் இலக்கிய வரலாற்றில்
மு.கருணாநிதி அவர்களின்
இலக்கியத்துக்கு ஆற்றிய பங்கினை
தமிழ் வாழும் வரை - நம்மாளுங்க
உச்சரித்த வண்ணம் இருப்பார்கள்!
கலைஞர் கருணாநிதி - அவரது
இலக்கியப் படைப்புகளில் தான்
மறைந்து இருக்கின்றார்! - அவர்
மறைந்து விட்டார் என்பதை
நான்
ஒரு போதும் ஏற்கமாட்டேன்!

-----------------------------------------------------------------------------

எப்பவும் பணம் பறிப்பதே
பள்ளிகளின் வேலையாகிப் போச்சு!
பிள்ளைகளின் படிப்பில
ஆசிரியர்கள் அக்கறை காட்டுவதாக
எவரும் சொல்லவில்லையே!
கல்வி கூட வணிகப் பண்டமா?
நாடு இருட்டில் மூழ்கவா?
பொறுப்பானவர்கள் சிந்திக்க வேண்டாமா?
வெறுப்பானவர்கள் கேட்கிற கேள்விகளுக்கு
என்னால பதில் சொல்ல முடியல!

-----------------------------------------------------------------------------

பன்னிரண்டாம் வகுப்புத் தேர்வு
இரண்டு தடவை எழுதியும்
ஒரு பௌதீகவியலில "S" தான் - அந்த
உயிரழகனா - இந்த முகநூலில
குழுமங்கள் நடாத்தும் போட்டிகளில
பன்னிரண்டு பட்டங்கள் வென்றவரென
எல்லோரும் என்னைக் கேட்பதால்
நான் பெற்ற பட்டங்களையே
காற்றினிலே பறக்க விடுகின்றேன்!

-----------------------------------------------------------------------------
பாப்புனையச் சில தகவல்


எதுகை, மோனை, உவமை, ஒப்பீடு
எதுவுமற்ற எழுத்துகளால்
வரிவரியாகத் தொகுத்த பொய்கள்
என்றும் பா ஆகிவிடாதே!

எண்ணி எண்ணி எழுதித் தான்
எதுகை, மோனை முட்டிக்கொள்ள
உவமை, ஒப்பீடு சுட்டிக்காட்ட
வரிவரியாகத் தொகுத்த உண்மைகள்
என்றும் பா ஆகிவிடாதே!

ஏமாறத் தூண்டிய பொய்கள்
உள்ளத்தை நோகடித்த மெய்கள்
சொல்லத் தோன்றிய எண்ணங்கள்
மெல்ல எழுதத் தூண்டவே
மோனைகள் மோதிக்கொள்ள
எதுகைகள் துள்ளிக்குதிக்க
உவமைகள் ஈர்த்துக்கொள்ள
ஒப்பீடுகள் சுட்டிக்காட்ட
வரிவரியாகத் தொகுத்துக்கொள்ள
வந்தமைவதே 'பா' என்கிறார்கள்!

எழுத்து, அசை, சீர், தளை,
அடி, தொடை, அணி, நடை
அடுத்துப் பா, பாவினம் என்றிட
அங்கும் வண்ணத்துப் பா வருமென்றும்
எடுப்பு, தொடுப்பு, கண்ணி, இசையென
பண்ணத்திப் பா (இசைப் பாடல்) வருமென்றும்
யாப்பறிந்த பாவலர் அழகுறச் சொல்வார்!

எந்தன் எழுத்தும் "பா" ஆகாமலே
"பா" நடையிலே புனைவதனாலே
புதுப்பா என்றால் இப்படித் தானென
இணைய வழி, வலைப்பக்க வழி
புதுப்பா புனைவோரிடம் மோதவியலாது
பின்வாங்கும் எளியவன் ஆனாலும்
"பா" பற்றிய தகவலைப் பகிர்ந்தேனே!
---------------------------------------------------------------------------------------------
அடிபட்டால்...


அந்தக் காலத்தில
மணி (Bell) இல்லை, தடுப்பு (Break) இல்லை
அடிபட்டால் பல்லு இல்லையென
மிதிவண்டி (Bicycle) மிதித்த நினைவுகள்
இந்நாளும் உள்ளத்தில உருளுதே!
இந்தக் காலத்தில
அதிரொலி (Horn) இல்லை, தடுப்பு (Break) இல்லை
காற்றுக் கூட தடுக்க இயலாதென
அடிபட்டால் ஆளாளுக்கு உயிரில்லையெனை
அதிகூடிய குதிரை வலு கொண்ட
உந்துருளியில் (Moterbike) விரைவாகப் பயணிப்போமே!
காலம் மாறினாலும்
கடுகளவேனும் எண்ணிப் பாருங்கள்!
பிறரை வாழ வைக்கப் பிறந்த
நீ
பிறரைச் சாகடிக்காமலாவது
பயணம் செய்யலாமே!

Monday, 6 August 2018

எழுதத் தூண்டின எழுதினேன்!


நம்பிக்கை

கடவுள் இருப்பதனால் தான்
நீங்கள் வாழ்கிறீர்கள் - அந்த
கடவுளுக்கு நன்றி கூறுங்கள்!
கடவுள் இல்லை என்போரும்
வாழ்கின்றனர் தான் - அதற்கு
தன்னம்பிக்கை தான் மருந்து!
கடவுள் இருக்கிறரோ இல்லையோ
நாங்கள் இருக்கிறோம் என்றால்
ஏதோ ஒரு நம்பிக்கை தான்
எம்மை வாழ வைக்கிறதே!
வெறுப்புகளைச் சுமப்பவர்களே - அதை
கொஞ்சம் இறக்கி வைத்தால் தானே
நம்பிக்கை மலரும் என்பேன்!
உருள மறுக்கும் உலகையே
நம்பிக்கை என்ற கருவியால்
உருட்டிக் கொண்டே இருக்கலாம்!
நீங்களும்
ஊக்கம் பெற்று உயரப் பறக்கலாம்!!


எழுதத் தூண்டின எழுதினேன்!

"என்னைப் பற்றி
நன்கறிய விரும்பினால் - என்
எதிரியைக் கொஞ்சம் கேட்டறி (விசாரி)
நான் சொல்வதை விட
அவர்கள் தான் அதிகம் சொல்வார்கள்!"
என்றவாறு
பாவலர் மூ.மேத்தா சொன்ன நினைவு!
அதனையே
உள்ளத்தில் இருத்தி
"என்னைப் பற்றி
என்னிடம் கேட்டுப் பயனில்லையே!
எதிரியிடம் கேளுங்கள்...
என்னைப் பற்றி அ - ஃ வரை
அப்படியே சொல்லுவார்கள்!"
என்றவாறு
நானும் பாப்புனைய முனைந்தேன்!
அதற்கு அடுத்தபடியாக
"ஊருக்குள்ளே வந்தும்
நாலாளுகளைக் கேட்டுப் பாருங்கள்
என்னைப் பற்றி எல்லாமே
உள்ளதை உள்ளபடி உரைப்பார்கள்!"
என்றவாறு
பொதுவான எண்ணத்தையும் பகிர்ந்தேன்!
இதற்கெல்லாம்
"வெறித்தும் முறைத்தும் சிரித்தும்
எல்லோரும் என்னைப் பார்க்க...
நானும் கையில காசின்றி
அழுவாரைப் போல அலைய
அதனை
ஏழு தலைமுறைப் பணக்காரன்
பிச்சை எடுப்பதைப் பாரென்று
எதிரிகள் சிலர் பரப்பி விட்டனரே!
என்றவாறு
பட்டறிந்தவையே எழுதத் தூண்டின!



தொலைந்து போன என் கவிதைகள்
யாழ் நல்லூர் வீதியிலே
புதிய அகிம்சைக்கு வழிகாட்டிய
திலீபன் அண்ணாவை இழந்து
மூன்றாம் ஆண்டு நினைவாக (25-09-1990)
யாழ் ஈழநாதம் நாளேட்டில் வெளிவந்த
எனது முதலாவது கவிதையே
பாராட்டையும் புகழையும்
எனக்கு ஈட்டித் தந்தமையால் 
இன்றுவரை எழுதுகோல் ஏந்துகிறேன்!

"உலகமே
ஒரு கணம் சிலிர்த்தது
உண்ணா நோன்பு இருந்து
உயிர் நீத்த திலீபன் அண்ணாவின்
உயிர் மூச்சு நின்ற போது..." என்று
எழுதியது மட்டும் அடிக்கடி நினைப்பேன்!

"உலகிற்கு
அகிம்சையைப் போதித்த
மகாத்மா காந்தியின் இந்தியாவிற்கே
புதிய அகிம்சையைப் போதித்தவர்
எங்கள் திலீபன் அண்ணா!" என்று
அடுத்த வரிகள் தொடரலாமென
மீட்டுப் பார்க்கிறேன் - ஆயினும்
எஞ்சிய வரிகள் என்னிடம் இல்லையே!

"மென்மைகள்
காவலாக இருப்பதால் தான்
அழிக்கப்படுகிறது கற்பு!
வன்மைகள்
காவலாக இருப்பதால் தான்
காக்கப்படுகிறது கற்பு!" என்று
கொழும்பு வீரசேசரி நாளேட்டில்
"கற்பு" என்ற தலைப்பில் (1993)
வெளிவந்ததோட பிறவும் வெளியாகின!

அரங்குகளில் வாசித்துமான
ஏடுகளில் வெளியாகியதுமான
எத்தனையோ படைப்புகளை
நானும் இழந்துவிட்டேன் - அவை
காணாமல் போனதாகக் கருதினாலும்
நெஞ்சை விட்டு நீங்காத இழப்பே! 
அவை தான் - இன்று வரை 
என்னை எழுதத் தூண்டுகின்றனவே!

Tuesday, 31 July 2018

இலக்கியத் திருட்டு


இலக்கியத் திருட்டு

ஒவ்வொருவர் எழுத்தும் வேறுபட்டாலும்
ஒரு சிலரின் புனைவு (கற்பனை)
ஒன்றுபடலாம் தான்! - அது
இலக்கியத் திருட்டாகாதே!
ஒருவர் எழுதியது போல
மற்றொருவர் எழுதியிருந்தால்
எவரது எழுத்தைப் படியெடுத்தாரென
கண்டுபிடிக்க முண்டியடித்தால்
இலக்கியத் திருட்டைக் காண்பீரே!
எவரெவருடைய எண்ணமென
பொறுக்கிச் சுட்டிக்காட்டியே
நானும் எழுதுகிறேன். - அதை
இலக்கியத் திருட்டு என்கிறாங்களே!
என்னைக் கேளாமல்
என் பெயரைச் சுட்டாமல்
எனது எண்ணங்களைப் பொறுக்கி
தங்களுடையதெனப் பகிருவது
இலக்கியத் திருட்டு இல்லையா?
இலக்கியத் திருட்டுப் பற்றி
அறியாதோர் அறிந்திட்டால் - சிறந்த
இலக்கிய வெளியீடுகளை வெளிக்கொணர
இடமுண்டு என்பதை அறியாதோரும் உண்டோ?


படிப்பது சுகமே!

படிக்கப் பின்வாங்கும் உள்ளங்களே!
படிக்கத் தொடங்கும் வேளை
புளிக்கிறதா? - பரவாயில்லை
படிக்க முயன்று பாருங்கள்...
கொஞ்சம் படித்த பின்னே
படிப்பது சுகமே என
படிக்கப் படிக்க இனிக்கிறதே என
நீங்களாகவே விரும்பிப் படிப்பீர்களே!
சின்னப் பிள்ளையாக இருக்கையிலே
படிப்புக்குப் பின்னடித்த நானே
பொத்தகக் கடையையே வீட்டிலிறக்கியே
இனிக்க இனிக்கப் படிக்கிறேனே!
தம்பி! தங்கைகளே! - இன்று
புளிக்கின்ற படிப்புத் தானே - நாளை
இனிக்கும் படிப்பு ஆகிறதே! - நீ
படித்த படிப்புத் தானே - நாளை
உனக்கென்ற தனி அடையாளத்தை
நிலைநிறுத்தப்போகிறதே! - அதுவே
உலகம்
 
உன்னை நாடவைக்க உதவப்போகிறதே!



படித்தமைக்குச் சான்று

படிப்புக்கான தகுதியே
சான்றிதல்களின் பட்டங்களின் எண்ணிக்கை - அது
படிப்பின் அளவுகோல் என்பேன்! - அதனை
விளம்பரங்களில் காணமுடியுமே!
படித்தமைக்கான தகுதியே
படித்ததைப் பாவித்த மக்களின் எண்ணிக்கை - அது
படித்தவரின் அளவுகோல் என்பேன்! - அதனை
மக்கள் பேச்சுகளில் காணமுடியுமே!
படிப்பைக் காட்டித்திரிவதை விட
படித்ததைப் பலரும் பயனீட்ட வழங்கினாலே
படித்தவரென மக்கள் பாராட்டுக் கிட்டுமே! - அதுவே
இறுதி வரை எம்மோடு பயணிக்கும்!


அடையாளம்

படித்துப் படித்துச் சொன்னார்கள் - உங்கள்
அடையாளத்தை இழக்காமல் வாழப் பழகென்று!
படித்துப் படித்துப் பின்பற்றினேன் - எங்கள்
அடையாளத்தை இழக்காமல் பணி செய்யவே!
என் பணி என்னை அடையாளப்படுத்துகிறதே!
உங்கள் பணி உங்களை அடையாளப்படுத்துகிறதா?



எண்ணிப்பாருங்க...

நானே எனக்குக் கடவுள்!
நானே எனக்குப் பிரம்மா!
நானே எனக்கு நீதிபதி!
பதினொரு பக்கம் பார்த்து
முடிவு எடுக்கும் என்னை விட
பெரியவர் எவரும் உளரோ?

குறிப்பு:
பிரம்மா - படைத்தற் கடவுள்
பதினொரு பக்கம் - முன், பின், இடம், வலம், கடந்த காலம், நிகழ் காலம், எதிர்காலம், நேர் எண்ணம், மறை எண்ணம், நேர் மறை எண்ணம், எதிர் மறை எண்ணம்.

"மனிதன் கடவுளாக மாட்டான்
மனிதன் மனிதனாக வாழவே
பதினொரு பக்கங்களையும் பார்த்து
ஒவ்வொரு முடிவையும் எடுக்கலாமே!" என
நினைவூட்டவே இவ்வாறு எழுதினேன்!

Wednesday, 25 July 2018

இரட்டைக்கிளவியோடு விளையாடினேன்!

ஓர் இணையாக வருகின்ற சொல்களாயும் அவை பிரிந்தால் பொருள் தராததுமாக அமைவன இரட்டைக்கிளவி எனத் தமிழில் பேசப்படுகிறது. எ-கா: நறநற என பல்லைக் கடித்துக் காட்டினாள் என்பதில் "நறநற" என்பது இரட்டைக்கிளவி எனலாம்.

"சலசல சலசல இரட்டைக் கிளவி
தகதக தகதக இரட்டைக் கிளவி
உண்டல்லோ தமிழில் உண்டல்லோ
பிரித்து வைத்தல் நியாயம் இல்லை
பிரித்துப் பார்த்தால் பொருளும் இல்லை
இரண்டல்லோ இரண்டும் ஒன்றல்லோ" என
பாவலர் வைரமுத்து அழகாகச் சொல்லியுள்ளார்.

சின்னப் பொடியன் நானும் இரட்டைக் கிளவி எனும் இணைச் சொல்களை கையாண்டு 'பா' நடையில கதையளந்துள்ளேன். 'பா' புனைய விரும்புவோர் இதனைக் கையாண்டால் சுவையான பாக்களை உருவாக்கலாம். வாருங்கள் இரட்டைக்கிளவியோடு விளையாடுவோம்!

இரட்டைக் கிளவி எனும் இணைச் சொல்களைக் கீழுள்ள இணைப்பைச் சொடுக்கிப் பார்வையிடலாம்.

சலசல என ஓடிய ஆற்றின் மேலே
மடமட என முறிந்தன மரங்கள்!
சரசர என்று மான்கள் ஓடின
கீசுகீசு என குருவிகள் கத்தின
கிசுகிசுவாக "ஆறு வேரைக் கரைத்தது" என
பரபரப்பாக ஊரெங்கும் செய்தி!

கரகரத்த குரலில் "விரைவாக முடி" என
தொள தொளச் சட்டைக்காரர் சொல்ல
சாரைசாரையாக வந்த மக்கள்
கசகச என வியர்வை சிந்தி
மளமள என மரங்களை அகற்றிய பின்
சிலுசிலு என வீசும் காற்றில் ஓய்வாம்!

கிச்சுக்கிச்சு மூட்டியவாறு ஓய்வெடுத்தோரிருக்க
குளுகுளு ஆற்றங்கரைப் பக்கமாய்
கிளுகிளு படங்களில் வருவோரைப் போல
கலகலப்பான பேச்சோடு வாலைகள் வர
தளதளவென்று நின்ற காளைகள் நோக்க
குடுகுடு கிழவர் "காதல் அரும்புதோ?" என்றார்!

சொரசொரப்பான தாடிக்காரக் காளை
மொசுமொசுவென மயிருள்ள வாலையிடம்
குசுகுசு என்று "காதலிப்பியா?" எனக் கேட்க
சவசவ என்று முகம் சிவக்க - அவளோ
கடகட எனச் சிரித்தவாறு சொன்னாள்
தகதக என மின்னும் தன்னவரைக் கேளென்று!

விறுவிறுப்பாக உரையாடல் நடக்கையிலே
தைதை என்று ஆடினாள் அந்த வாலை
திடுதிடு என நுழைந்த அவளது கணவன்
கும்கும் என "காதலிப்பியா?" என்றவனைக் குத்த
வெடவெட என நடுங்கியது அவனது உடல்
பொலபொல எனக் கண்ணீரும் வடித்தான்!

பேந்தப்பேந்த விழித்தோரும் சிரித்தோரும்
வழவழ என்று பேசியவாறு அமைதியாக
லொடலொட எனப் பேசும் வாலை ஒருவள்
மொறுமொறு என்று சுட்ட முறுக்கு விற்று வர
சுடச்சுட வேண்டிக் கடித்துக் கொறித்துண்டு
மடமட என ஆற்று நீரைக் குடித்துக் கலைந்தனரே!

பள்ளத்தில் விழ முன்

தரதர என நண்பன் இழுத்துச் செல்ல
சதசத என்ற சேற்றில் விழுந்ததும்
குபுகுபு எனக் குருதி சிந்தாது கசிய
வடவட என உடல் வேர்க்கும் வேளை
கமகம என மணந்த பக்கம் திரும்ப
கிடுகிடு பள்ளம் தெரியக் கண்டதும்
படபட என இமைகள் கொட்ட
கிறுகிறு என்று தலை சுற்றியதே!

சுற்றுலாச் சொன்ன செய்தி!

கலகலப்பாக நண்பர்களோடு கதைத்து
அழகழகென மின்னுமிடங்களை எண்ணி
அடுக்கடுக்காகத் திட்டங்களைத் தீட்டி
மளமளவெனச் சுற்றுலாச் சென்றோம்!

சலசலவென அலைகள் வீசும் கடற்கரைகள்
பளபளவென வெயிலில் மின்னும் மலைகள்
கமகமவென மணம் பரப்பும் பூங்காக்கள்
சரசரவென ஓடியோடி உலாவந்தோம்!

புகைபுகையாய் வெண்சுருட்டை ஊதினோம்
கசக்கக்கசக்க மதுபானத்தையே குடித்தோம்
குளுகுளுவெனக் குளிரக் குளித்தோம் - ஆயினும்
சிலுசிலுவென்ற காற்றிலே கெடுநாற்றம் போகலையே!

கடகடவெனச் சிரித்து மகிழ்ந்தோம் - நாம்
கிடுகிடுவெனப் பலவிடம் போய்ப் பார்த்தோம்
புதுப்புதுச் சூழலைச் சுற்றிவரவே - ஈற்றில்
திருதிருவென ஊர்திரும்பப் பணமின்றி விழித்தோம்!

டிக் டிக் என நல்லநேரம் கரைய
பட்டுக்கெட்டுப் பொற்காலம் வீணாக
அடிக்கடி நாம் விட்ட தவறுகளால்...
பக்குப்பக்கென எங்கள் நெஞ்சு அடித்ததே!

குறிப்பு: ஒன்றிலே திட்டமிட்டு இன்னொன்றிலே கோட்டைவிடும் உறவுகளுக்காக எழுதியது.