Translate Tamil to any languages.

Friday, 7 December 2018

வெள்ளை உடைக்குள் கரையும் பருவம் - சிறுகதைகள்


உலகத் தமிழ் வலைப்பதிவர்களில் ஒருவரான சந்திரகௌரி சிவபாலன் (கௌசி) அவர்களின் "வெள்ளை உடைக்குள் கரையும் பருவம்" என்ற நாற்பத்திரண்டு சிறுகதைகளின் தொகுப்பு நூல் 08/12/2018 அன்று ஜேர்மனியில் மிகவும் சிறப்பாக அறிமுகம் செய்து வைக்கப்படவுள்ளது. இவ்வறிமுக விழாவில் வலைப்பதிவர் கௌசி அவர்களின் உலகெங்கிலுமுள்ள வலையுலக நட்புறவுகள், அவரது வாசகர்கள் எனப் பலர் ஜேர்மனிக்கு வருகை தந்து சிறப்பிக்கவுள்ளனர்.

இந்நூலாசிரியரின் இந்நூல் 17/06/2018 ஞாயிறன்று காலை 9 மணிக்கு இலங்கை, யாழ்ப்பாணம் பொது நூலகத்தில் வெளியிட்டு வைக்கப்பட்டுள்ளது. அந்நிகழ்வில் பங்கெடுத்தவர் என்ற வகையிலும் 2010 இலிருந்து வலையுலகை உலா வருவதனாலும் ஜேர்மனியில் இடம்பெறும் நூலறிமுக விழாவில் பங்கெடுக்கும் உலகெங்கிலுமுள்ள வலைப்பதிவர்கள் இந்நூலைப் பற்றியறிய உதவும் தகவலைப் பகிர விரும்புகின்றேன்.
--------------------------------- நூல் அறிமுகம் ----------------------------------

இலக்கிய வாசகர்களின் உள்ளங்களை இலக்கியப் படைப்பாளிகள் கொள்ளையடிப்பது என்பது இலகுவானதல்ல. வாசகர் விருப்பறிந்து, தமது திணிப்புகளைத் தூக்கியெறிந்து, வாசகர் சுவையறிந்து, தமது வசப்படுத்தும் எழுத்து நடையாலே தான் வாசகரைத் தம்பக்கம் இழுத்துக்கொள்ள முடியும்.

இவ்வாறாகத் தான் பல முன்னோடி எழுத்தாளர்கள், வாசகர்கள் தமது புனைகதை இலக்கியத்தை நாடவைக்க (தமது எழுத்தால் வாசகரைக் கட்டிப் போட) முயன்றுள்ளனர். இவ்வாறே (www.gowsy.com வலைப்பூ) சந்திரகௌரி சிவபாலன் (கௌசி) அவர்கள் தமக்கென வாசகர் அணியினைப் பேணி வருகின்றார்.

கையடக்கமாக அமைந்துள்ள இந்நூலின் அட்டை கறுப்பு நிறம். பின்னட்டையில் எழுத்தாளர் வி.ஜீவகுமாரன் அவர்கள் வழங்கிய நூலாசிரியரைப் பற்றிய குறிப்பும் முன்னட்டையில் "வெள்ளை உடைக்குள் கரையும் பருவம்", நூலாசிரியர் பெயர், வெளியீடு: ஜேர்மனி தமிழ் கல்விச் சேவை ஆகியன வெள்ளை எழுத்துக்களால் அழகாகப் பொறிக்கப்பட்டுள்ளது. உள்ளே கண்ணிற்கு எரிச்சலை ஏற்படுத்தாத செம்மஞ்சள் (ஐவரி) தாளில் கறுப்பு எழுத்துக்களால் அச்சடிக்கப்பட்டுள்ளது. உள்ளே நுழைந்து வாசிக்கும் போது எழுத்து அளவு அரைப் புள்ளியாயினும் பெரிதாக்கி இருக்கலாமெனத் தோன்றுகிறது.

முன்னட்டையில் பக்கங்களைத் தட்டும் விளிம்பில் மட்டும் மங்கலான வெண்ணிறம் வெளிப்படுகிறது. அதேவேளை வெண்ணிறப் பூவொன்றும் விரிந்து காணப்படுகிறது. இதனைக் கருத்தில் கொண்டு நூலுக்குள்ளே நுழைந்தால் "வெள்ளை உடையணிந்த ஒருவரின் இளமைக்கால வாழ்வை வெளிக்கொணருவதோடு ஒளிமயமான வாழ்வுக்கு வழிகாட்டும் தகவல் ஒளிந்திருக்கு." என்பதை வாசித்தறியலாமெனத் தோன்றுகிறது. எப்படியிருப்பினும் நூலின் அட்டை வடிவமைப்பு, தெளிவான அச்சடிப்பு ஆகியவற்றை மேற்கொண்ட இலங்கை, யாழ்ப்பாணம் அன்ரா பிறின்டர்ஸ் குழுமத்தினருக்குப் பாராட்டுகளைத் தெரிவிக்கலாம்.

"ஓர் ஐரோப்பிய வாழ்வியல் தரிசனம்" என்ற தலைப்பில் நூலாசிரியருக்குக் கற்பித்த பேராசிரியர் துரை மனோகரன் அவர்களின் எண்ணப்பதிவுகள் நூலின் முதலுரையாக அமைந்திருப்பதோடு நூலின் சிறப்புக்கு வலுச் சேர்க்கின்றது.

அடுத்து "ஒரு வாசகனின் வாக்குமூலம்" என்ற தலைப்பில் எழுத்தாளர் வி.ஜீவகுமாரன் அவர்கள் சிறுகதைகளை அழகுணர்வோடு அறிமுகம் செய்கின்றார். அதனால் வாசகர்கள் விரைவாகக் கதைகளைப் படிக்க நுழைந்து விடுவார்கள்.

அடுத்ததாக "சில நிமிடங்கள் நுழை வாயிலில் உங்களுடன்..." என்ற தலைப்பில் நூலாசிரியர் வாசகரை இடைமறிக்கிறார். "சமுதாயக் கண்கள் திறக்கப்பட வேண்டும். தான் வாழும் சூழலும் நலம் பெற வேண்டும்." எனத் தனது எழுத்தின் நோக்கை நூலாசிரியர் முன்வைக்கின்றார். இதனால் கதைகள் எப்படிப்பட்டதாக இருக்குமென்பதை நீங்களே கண்டுபிடிக்கலாம்.

நூலின் இறுதிப் பகுதியில் பக்கம் 223-224 இல் "கௌசியின் வரிகளை நேசித்தவர் வரிகள்" என்ற தலைப்பில் நூலாசிரியரின் வாசகர்கள் வெளிப்படுத்திய கருத்துகள் இடம்பெறுகிறது. அவை நூலாசிரியரின் ஆற்றலை மதிப்பீடு செய்யக்கூடிய அளவுகோலாகத் தென்படுகிறது.

சரி! இனிக் கதைகளை வாசிக்கப் போகலாம் தான்... ஆயினும், கதைகள் எவ்வாறு அமைந்திருக்குமெனத் தெரிந்துகொள்வோம். கதாசிரியர் தான் சொல்வதாகவோ கதாசிரியர் தான் பார்த்ததை அப்படியே சொல்வதாகவோ கதாசிரியர் தான் ஒரு கதாபாத்திரமாக நின்று வெளிப்படுத்துவதாகவோ கதைகள் நகருவதைக் காணலாம். கதைகளின் முடிவில் அடைப்புக்குள் உண்மைக் கதை, உண்மை கலந்த கதை, யாவும் கற்பனை எனக் குறிப்பிட்டிருப்பார்கள்.

அதேவேளை கதையின் முடிவினை கதாசிரியர் தானே சொல்லி முடிப்பதாகவோ வாசகர்கள் தாமே கதையின் முடிவினை கண்டுபிடிக்க இடமளிப்பதாகவோ கதைகள் முடிவுக்கு வரலாம். இதன் அடிப்படையில் வாசகர்கள் கதைகளை வாசிக்கப் பழகினால் மகிழ்ச்சி அடையலாமெனக் கூறிக்கொண்டு நான்கு கதைகளைத் தொட்டுக்காட்ட விரும்புகிறேன்.

"அப்பா என்னவானார்!" என்ற கதையே முதல் பக்கத்தில் இடம் பிடித்திருக்கிறது.
"இஞ்ச பாருங்கோ இது நான் காசு கட்டி வாங்கின வோஸ் மெசின். இதில் என்ர பிள்ளைகள்ட உடுப்பும் என்ர உடுப்பும் தான் கழுவலாம். உங்கட ஊத்தைகள் இதுக்குள்ள போட்டுக் கழுவாதீங்க"
"அப்படியென்றா நானென்ன கையாலயா கழுவிறது"
என்றவாறு முதலாவது கதையே கணவன் - மனைவி சிக்கலில் தான் தொடங்குகிறது.

மேற்படி கதையில "பலமுறை தந்தையுடன் தொடர்புகொள்ள முடியாத பிள்ளைகள் அப்பா என்னவானார் என்று தெரியாமல் ஜேர்மனி பொலிசாருக்கு அறிவித்தனர். வீட்டு இலக்கத்தைத் தேடிச் சென்ற பொலிசார் வீட்டு அழைப்பு மணியை அழுத்தியும் திறக்கப்படாத கதவினை திறந்தனர்." பிள்ளைகளது தந்தை அங்கே பிணமாகக் கிடந்ததாகக் கதை முடிவுக்கு வருகிறது.
இக்கதையில் புலம்பெயர் நாட்டில் நிகழும் குடும்பச் சிக்கலை நூலாசிரியர் சிறப்பாகப் படம்பிடித்துக் காட்டுகின்றார்.

"கவிதை பாடலாம்" என்றொரு கதை பக்கம் 44 - 50 இல் காணப்படுகிறது. "தாயின் நீண்ட விளக்கத்தில் தெளிவு பெற்ற மகளும் காலத்துக்கேற்பக் கவிபாடும் உத்தியில் தன்னை ஈடுபடுத்தும் முனைப்புடன் அகக்கண்ணைத் திறந்தாள். அவள் கற்ற இலக்கணமும் தாயின் கருத்தும் ஒருங்கிணைய கற்பனைக்கு மோட்டர் பூட்டினாள்." என்றவாறு தாயானவள் மகளுக்குக் கவிதை எழுதத் தூண்டுவதாகக் கதை நகருகிறது.

இக்கதை, கதை போலன்றி 'கவிதை எழுதக் கற்பித்தல்' பாடம் நடாத்துவதாக அமைந்திருக்குமென நீங்கள் நினைக்கலாம். அப்படியாயின் இந்நூலைப் பெற்று இக்கதையினை முழுமையாக வாசிக்கவும். இக்கதையினை வாசித்தவர்கள் சிறந்த கவிதையினை எழுதத் தேவையானவற்றை பொறுக்கிக்கொள்ள இந்நூல் உதவுமென நம்புகின்றேன்.

"மதிவதனி ஏன் மதி இழந்தாள்" என்றொரு கதை பக்கம் 149 - 152 இல் காணப்படுகிறது. "குடிக்கிறதுக்கு அளவு கணக்கில்லை. மனிசர நிம்மதியா இருக்க விடுறீங்களே. எப்பதான் இந்த பார்ட்டிகள் குறையப் போகுதோ" என்றவாறு மனைவி, தன் கணவனின் தொல்லை தாங்காது அலுத்துக் கொள்வதைக் கதையில் காணமுடிகிறது. மேலும், கணவன் மனைவிக்கு மதுவை ஊட்டிவிட்டார் என்றவாறு கதை நகருகிறது. மது போதையினால் ஏற்படும் விளைவினை நூலாசிரியர் இக்கதாபாத்திரங்களூடாகக் குடும்ப உணர்வோடு இயல்பாகப் படம்பிடித்து வெளிக்காட்டுகின்றார்.

நூலின் தலைப்பாகிய "வெள்ளை உடைக்குள் கரையும் பருவம்" என்றொரு கதை பக்கம் 201 - 206 இல் காணப்படுகிறது. "உனக்கு வயது 30. இப்படி எத்தனை காலம் வாழப் போகின்றாய். வாழ்க்கை ஒரு முறை தான். அதுவும் வாழத்தான்." என மதியுரை கூறுவதைப் பார்த்தால் கதையில் வரும் கதாநாயகியின் (மருத்துவத் தாதியின்) பருவம் கரைவதேன் என்பதை நீங்கள் வாசித்து அறியலாம். மேலும், "இப்பெல்லாம் யாரும் பெடியனைக் கண்டால் காதல் வர மாட்டன் என்கிறது." எனக் கதாநாயகி தெரிவிப்பதைப் பார்த்தால் பருவம் கரையக் காரணம் காதல் தானென எண்ணத் தோன்றுகிறது. இருப்பினும் மறக்காமல் நூலை வேண்டிப் படித்தால், ஐயங்களும் ஊகங்களும் முடிவுக்கு வந்துவிடுமே!

"வெள்ளை உடைக்குள் கரையும் பருவம்" என்ற நூலை அறிமுகம் செய்வதாகக் கூறிக்கொண்டு நாற்பத்திரண்டு கதைகளையும் குறுக்கிச் சொல்ல இயலாது என்பதே உண்மை. பெரும்பாலான கதைக் கருப்பொருள், சமகாலத்தில் (2018 இல்) ஆங்காங்கே இடம்பெறும் உண்மை நிகழ்வுகளை மீட்டுப் பார்க்க உதவுகின்றது. இந்நூலில் வணிக நோக்கிலான கற்பனைக் (மசாலாக்) கதைகள் இல்லையென்றே சொல்லலாம். அருமையான சிறுகதைகளைக் கொண்ட இந்நூல் வாசகரின் உள்ளத்தில் நல்லதோர் இடத்தினைப் பிடிக்கும் என்பதே எனது கருத்து.
முற்றும்.

Sunday, 2 December 2018

நான் சொர்க்கலோகம் போய்ச் சேர்ந்தேனே!




இயமதர்மராசாவின் கட்டளைப் படி தான்
சித்திரபுத்திரனாரின் கணக்கின் படி தான்
இயமலோகத் தீர்ப்பளிக்கும் மன்றில் தான்
பூலோகத்தில் இருந்து தூக்கியோரைத் தான்
விசாரித்துச் சொர்க்கமா நரகமா செல்வோரென
வேறாக்கும் பணிக்கு அழைத்தனர் போலும்!

இயமலோகத் தீர்ப்பளிக்கும் மன்றில் தான்
சரத் முத்தெட்டுவேகம, கொல்வின் ஆர்.டீ.சில்வாவென
சிங்கள இடதுசாரிகளோட தான் - என்னையும்
வலப் பக்கமாகத் தான் இருத்திப் போட்டாங்களே!
என்னைக் கண்ட சரத் முத்தெட்டுவேகம தான்
யாழ்ப்பாணத்துக் குட்டியன் வந்திருப்பதாக - அந்த
கொல்வின் ஆர்.டீ.சில்வாவிற்கு அறிமுகமாக்க
ஆளுக்காள் என்னை நேர்காணல் செய்தனரே!

யாரண்ணே 'புலியண்ணை' எழும்பண்ணே என
பெரிய ஏட்டினை விரித்து வைத்தவாறே
சித்திரபுத்திரனார் தன் கணக்கினை வாசிக்க...
'எங்கையண்ணே உன்ர மூச்சுப் போனது' என
இயமதர்மராசா தன் கேள்விக்கணையை எறிய
'வில்லிபாற, நாவலப் பகுதியில தான்
செவ்விளநீர் வெட்டுகிற கத்தியால தான்
தமிழனென் தலையறுத்து வீழ்த்தினர்!' என்றேன்!

'தலையறுத்து வீழ்த்திவிட தமிழா - நீ
என்ன தான் கேடு விளைவித்தாய்?' என
இயமதர்மராசா இரண்டாம் கேள்விக்கணையை எறிய
'நுனிப்புல் மேய்ந்தளவு கற்றிருந்த கணினியறிவை
ஒன்றும் விடாமல் அப்படியே படிப்பித்ததால்
சிங்கள மாணவர் மகிழ்வோடு கற்றுயர
பொறாமை பொங்கியெழப் பொறுமையிழந்த
சிங்கள ஆசிரியர் சிலரென்னைக் கொன்றனர்!' என்றேன்!

இயமதர்மராசா அடுத்தவர் பக்கம் நகரவே
'தமிழ் - சிங்கள வேற்றுமையை விதைத்துத் தான்
அரசியலாளர் பிழைப்பு நடத்துகினம் போல...' என
சரத் முத்தெட்டுவேகமவும் தகவலறிந்து துயரப்பட
'தமிழும் சிங்களமும் சமனில்லை என்றதுமே
இலங்கை இரண்டாகாதது ஏன்?' என்றறிய
கொல்வின் ஆர். டீ. சில்வா கேட்டுக்கொள்ள
ஓரணியில் தமிழர் ஒன்றுபடவே நடந்தேறுமென்றேன்!

பாக்கிடிக்கிற கையுரல் உலக்கையால தான்
அம்மம்மாவுக்கு அடித்துத் தலை வீங்கியதும்
சம்பல் அரைத்துத் தந்தால் உண்பேனென
பெத்தவளுக்கே அடிக்கடி தொல்லை கொடுத்ததும்
என்றெண்ணிப் பார்த்தாலும் நூறாயிரம் முறைப்பாடுகள்
சித்திரபுத்திரனாரின் கணக்கின் படி இருக்கென்று
இயமதர்மராசாவோ நரகத்தில் வீழ்த்திவிடுவதாக இறுக்க
பால்குடி மறவாத பச்சிளம் அகவையிலே
அறியாமல் புரியாமல் நானாடிய ஆட்டத்திற்கு
என்னை மன்னிக்குமாறு காலில் விழுந்தழுதேன்!

இயமலோகத் தீர்ப்பளிக்கும் மன்றில் - எவருக்குமே
மன்னிப்புக் கிடையாதென சித்திரபுத்திரனார் கைவிரித்து,
மாற்றாரை வாழவைக்க மதியுரை வழங்கினாலும்
அறியாமல் புரியாமல் கேடிழைத்து இருந்தாலும்
நாடெங்கும் நடுத்தெருவில் நாய்படாப் பாடுபட்டாலும்
ஆறுமாதம் ஓயாமல் உழுந்தாட்டும் ஒறுப்புண்டு - பின்
சொர்க்கமேயெனச் சித்திரபுத்திரனார் வாசித்த தீர்ப்பின் படி
சொர்க்கலோகம் போய்ச் சேர்ந்தேன் நானே!

இராமர் அணை எமக்குத் துணை!

இலங்கைத் தமிழ் மன்னரான
இராவணன் மீது போர் தொடுக்க
இந்தியாவின் அயோத்தி மன்னரான
ஆரியச் சக்கரவர்த்தி இராமர் புறப்பட
பாக்கு நீரிணையே இடைமறித்து நின்றதாம்!
இடைமறித்த பாக்கு நீரிணையைத் தான்
கடந்தால் தான் இராமர் வெல்லலாமென
தனது வானர சேனையோடு அனுமான்
முறைப்படி கட்டியமைத்த பாலம் தான்
இராமர் அணை/ பாலம் என்பது உண்மையே!
தலைமன்னார் - இராமேஸ்வரம் தீவுகளைத் தான்
17 லட்சம் ஆண்டுகளுக்கு முந்தி இணைத்த
இராமர் அணை/ பாலம் நமக்கெதற்கென
எல்லோரும் என்னைக் கேட்கக்கூடும்...
குமரிக்கண்டம் என்னும் பெரும் நிலப்பரப்பில்
கடற்கோள் ஊடறத்துத் துண்டாக்கினாலும் கூட
இலங்கை - இந்தியத் தமிழ் மக்கள் எல்லோரும்
ஒரு தாய் வயிற்றுப் பிள்ளைகள் தானே
தொப்புள்கொடி உறவைத் தொடர்ந்து பேண
இராமர் அணை எமக்குத் துணையென்பேன்!

சிங்களம் பேசுவோர் எண்ணிக்கையை விட
தமிழ் பேசுவோர் எண்ணிக்கை குறைவாம்
தமிழ் பேசுவோர் ஒற்றுமையை உடைத்து
சிங்களம் பேசுவோர் அடக்கியாள்வதை ஏற்று
தமிழ் பேசுவோர் ஒன்றுபட்டாலும் கூட
இந்தியத் தமிழ் மக்கள் பொங்கியெழுந்து
இராமர் அணை/ பாலம் வழியே வரலாமென
சிங்களம் பேசுவோருக்கு வயிற்றால அடிக்கவைக்க
இராமர் அணை எமக்குத் துணையென்பேன்!
இந்தியத் தமிழ் மக்களுக்கு எது வந்தாலும்
இலங்கைத் தமிழ் மக்கள் பொங்கியெழுந்து
உடனுக்குடன் உறவைப் பலப்படுத்த ஓடோடிவர
இராமர் அணை எமக்குத் துணையென்பேன்!

உலகில் முதலில் தோன்றிய மொழி
தமிழென்று முழங்கித் தான் பயனில்லை...
முதலில் உலகை ஆண்டது தமிழரென்றும்
உலகம் எங்கும் தமிழ் வாழ்ந்ததையும்
குமரிக்கண்ட வரலாறும் பாண்டியர் ஆட்சியும்
இராமர் அணை/ பாலம் தொழில்நுட்பக் கமுக்கமும்
நாம் நாளுக்கு நாள் பேசிப் பயனென்ன...
உலகம் எங்கும் ஒரு தாய் பிள்ளைகளாக
தமிழர் தம்முறவைப் பலப்படுத்தும் முயற்சியாக
மீளவும் இராமர் அணை/ பாலம் அமைத்துத் தான்
இலங்கை - இந்தியத் தமிழ் மக்கள் இணையலாமே!
இணைந்தாலும் உலகையாளப் பலமின்றிப் போகாமலே
சிங்கப்பூர் - மலேசியத் தமிழரும் இணையலாம் தான்
அப்படியே 153 நாட்டுத் தமிழரும் இணையலாம் தான்
ஈற்றில் உலகைத் தமிழர் ஆளலாம் தானே!

இராமர் பாலம் பற்றிய தகவலறிய கீழ்வரும் இணைப்பைச் சொடுக்குக.
http://tamilthagaval.in/இராமர்-பாலத்தைப்-பற்றிய/


இனம் காணப் பார்!

எவரெவர்
வாய்ப்பேச்சையும் நம்ப இயலாத போது
நல்லவரையும் கெட்டவரையும்
இனம் காணக் கற்றுக்கொடுப்பார்
எவருமில்லை இங்கே!
நல்லவரையும் கெட்டவரையும்
அவரவர் நடத்தையின் படியே
எவரெவர் கண்டுபிடிக்கிறாரோ
அவரே வாழ்வில் வெற்றியடைகின்றார்!
எதிர்ப்பட்டால் - தன் தலை
அறுபடுமென அஞ்சியே
எதிரி - எப்பவும்
எம்மை மூடி மறைக்கிறான்!
எம்மை நம்பியவன்
உலகத்திற்கே எம்மை
அறிமுகம் செய்து வைக்கிறான்
நாம் - எப்போதும்
தம்மைக் காப்பாற்றுவோமென்றே!
நல்லவர் - எமது
நல்லவற்றை அறிமுகம் செய்தே
எப்போதும் நற்பெயர் ஈட்டுவார்!
கெட்டவர் - எம்மை
கெட்டவரென்றே முத்திரை குத்தி
எப்போதும் தம்மைக் கெட்டவராக்குவார்!
நாம்
நல்லவர்களை
இனம் காண முடியாது போனால்
கெட்டவர்களால்
நாம் கெட்டுப்போக வாய்ப்புண்டே!
உலகமொரு நாடக மேடையாம் - அதில்
வாழ்வோர் எல்லோரும் நடிகர்களாம்
ஆகையால்
நாம் எல்லோரும்
நல்லவரையும் கெட்டவரையும்
இனம் காணக் கற்றுக்கொண்டே
வாழ்ந்தும் ஆக வேண்டுமே!

நன்கறிந்து உறவாடு!

வானுயரப் புகழ்வதும்
தேனொழுகப் பழகுவதும்
விரும்பியே நெருங்குவதும்
நிலையறிந்து உதவுவதும்
நம் வாழ்வில் வரவேணுமே!

நிலத்தினடிவரை இகழ்வதும்
புரிந்துணர்வின்றி நெருங்குவதும்
பகைமறைத்துப் பழகுவதும்
கேடுவிதைக்கக் கைகுலுக்குவதும்
நம் வாழ்வில் வரவேணாம்!

புகழ்வதும் இகழ்வதும் இரண்டென்பர்
விரும்புவதும் வெறுப்பதும் இரண்டென்பர்
புரிந்துணர்தலும் பகைப்பதும் இரண்டென்பர்
கெட்டதை விலக்கி நல்லதை உள்வாங்கி
நல்வாழ்வில் நாமுணர்ந்து வாழ்வோமே!

Friday, 16 November 2018

வாசகி ஒருவள் வேண்டினாள்!


செல்லமாகத் தடவிச் செல்லும் காற்று
மெல்லமாகக் காதில் இசைக்கும் காற்று
என் பாட்டைக் காவிச் சென்றது நேற்று
என் பாட்டைக் கேட்டு வந்தவள் ஈற்றில்
உன் பாட்டில் சுவை இல்லையெனச் சாற்றினாள்!

பாட்டின் புனைவில் சுவையா சுட்டிக் காட்டு
பாட்டின் பொருளில் சுவையா சுட்டிக் காட்டு
பாட்டின் இசையில் சுவையா சுட்டிக் காட்டு
பாடியவர் குரலில் சுவையா சுட்டிக் காட்டு
என்றதுமே சென்றாள் மீளமீள எழுதிக் காட்டென!

பாப்புனைய விரும்பின் மீளமீள எழுதிப் பாடு
பாவலராக விரும்பின் இசையோடு காற்றினில் பாடு
காற்றினில் வருமுன் பாட்டில் சுவை நாடும்
என் உள்ளம் இழகினால் உன்னைத் தேடும்
என்றதுமே எழுதியெழுதிப் பாவலராக வில்லையே!

நல்ல கவிதை

இலக்கணம் கலந்த கவிதை
தைத்த ஆடை போலப் போட்டால் (படித்தால்)
அழகாகத் தான் இருக்குமே!
இலக்கணம் கலக்காத கவிதை
தெருக்கடையில வேண்டிப் போட்ட
அளவில்லாத ஆடை போல
அழகில்லாத/ அமைப்பில்லாத கவிதையே!
கவிதைத் திறம் வெளிப்பட
கற்பனை, கவியாக்கத் திறன் போதாது
சற்றுத் தமிழ் இலக்கணம் கலந்தேனும்
வெளிப்படுத்தினால் தானே
நல்ல கவிதைகளை இனம் காணமுடியுமே!

எழுத்துக்குப் பெறுமதி வேண்டும்!
எவரும் தம்மைப் பற்றித் தான்
எப்படியும் எழுதலாம் தான்!
எவரும் அடுத்தவரைப் பற்றித் தான்
அடுத்தவரின் ஒப்புதல் இன்றித் தான்
எதையும் எழுதத் தான் இயலாதே!
அடுத்தவரைப் பற்றித் தான்
அடுத்தவரின் ஒப்புதல் இன்றித் தான்
அடுக்கடுக்காக எழுதி எழுதித் தான்
தன்னைப் பற்றிய எதனையும் தான்
மூடி மறைக்கத் தான் இயலாதே!
எழுதுகோல் ஏந்தியோரே! - கொஞ்சம்
அடுத்தவரைத் தான் புண்படுத்தாமலே
தாங்களே தங்களைப் பற்றித் தான்
தாங்கள் விரும்பியவாறு எழுதலாமென
என் திறனாய்வு சொல்கிறதே!
எவரைப் பற்றியும் எதையும் எழுதாமல்
என்னைப் பற்றியே நான் எழுதுவதே
எவருடைய தாக்குரையைத் தானும் - நானும்
வேண்டிப் புண்படாமல் இருக்கவே!
பரவாயில்லையே! - நாம்
நல்ல சூழலைக் கட்டியெழுப்பத் தான்
நமது நல்லறிவை பரப்பித் தான்
நற்றமிழில் நல்லெண்ணங்களையே
எழுதி வெளியிடலாம் வாங்க!
நாங்கள் எழுதி வெளியிடுவது
நல்லெண்ணங்களாக இருந்தால் மட்டுமே
நமது எழுத்துக்குப் பெறுமதி உண்டென்பேன்!

எவருக்கு ஒறுப்பு வழங்க?

காளை விருப்புக்கு இணங்கிய வாலையோ
வாலை விருப்புக்கு இணங்கிய காளையோ
இருட்டு அறைக்குள் கருவுற்ற படைப்பிதுவோ
திருட்டு வழியாகக் குப்பையிலே சேர்ந்ததுவோ
எவர் தவறில் பிறந்த குழந்தையிதுவோ
எவருக்கு எவர் ஒறுப்பு வழங்குவாரோ?

என்னால் மறக்க இயலாதவை!

இறக்கும் வரை மறக்க இயலாதது

பிறந்த நாள் தொட்டு அன்பாக வளர்த்த
அம்மாவைத் தான்!
மறக்க நினைத்தாலும் மறக்க இயலாதது
பிறந்த பின்னே அள்ளி அணைத்து அறிவூட்டிய
அப்பாவைத் தான்!
மறந்தாலும் எப்பவும் மறக்க இயலாதது
பள்ளிக்கூட வாழ்வும் எனக்குப் படிப்பித்தோருமான
அறிஞர்களைத் தான்!
மறக்க எண்ணினாலும் மறக்க இயலாதது
எனது முன்னேற்றத்திற்கு வழிகாட்டியும் ஊக்கமுமளித்த
அன்பானவர்களைத் தான்!
மறக்கப் பார்த்தாலும் மறக்க இயலாதது
இளமையில் என்னுள்ளத்தில் இடம் பிடித்த
கண்ணகிகளைத் தான்!
மறக்க விரும்பினும் மறக்க இயலாதது
வாழ்க்கையில் இல்லாளாக உள்ளத்தில் நுழைந்த
துணையாளைத் தான்!
மறக்க வைத்தாலும் மறக்க இயலாதது
ஏதுமற்ற நிலையிலும் தேவையானதை வழங்கியுதவிய
கொடையாளர்களைத் தான்!
மறக்க முயன்றாலும் மறக்க இயலாதது
தோல்விகளிலும் வீழ்ச்சிகளிலும் தோளில் தூக்கிக் காவிய
நண்பர்களைத் தான்!
மறக்கத் துணிந்தாலும் மறக்க இயலாதது
என்னையும் கடுகளவேனும் பொருட்படுத்தி மதிப்பளித்த
பெரியோரைத் தான்!
மறக்கத் தேடினாலும் மறக்க இயலாதது
எனது முயற்சிகளுக்கு இடையூறு வழங்காத
பார்வையாளர்களைத் தான்!
மறக்க நினைத்தாலும் மறக்க இயலாதது
எனது முன்னேற்றத்திற்கு முட்டுக்கட்டை போட்ட
எரிச்சல்காரர்களைத் தான்!
கரைகின்ற பொழுதோடு மறைகின்ற வாழ்வில்
மறக்க இயலாத நிகழ்வுகளும் உறவுகளும்
உள்ளத்தில் குந்தியிருப்பதால் சாவின் பின்னும்
உயிரோடு இணைந்து பயணிக்கும் என்பதை
மறக்கத் தான் நாடினாலும் மறக்க இயலாதே!